Ein fólkateljing gevur ein tvørskurð av samfelagnum, sum í hagtølum

lýsir, hvussu vit liva í Føroyum. Hetta eru hagtøl, sum skapa grundleggjandi

vitan um Føroyar og kunnu brúkast í politiska arbeiðnum, eins væl

og í mongum øðrum høpi.

Síðani seinasta manntal í 1977 hava vit ikki sæð hagtøl um føroysku

húskini. Einasti møguleiki í dag at fáa hesar upplýsingar er at fara á gátt

hjá øllum í landinum og spyrja.

Týdningarmesta tilfeingið í einum landi eru og verða menniskjuni. At hava

vitan um, hvørji vit eru, er ein neyðug fortreyt fyri at vita, hvussu eitt

nýmótans samfelag skal skipast.

Ein fólkateljing skrásetir neyvt, hvussu samfelagið sær út ein ávísan

dag, men longu dagin eftir broytist støðan. Kortini hevur tað týdning at

fáa eitt neyvt hagtalsyvirlit, tí so ber til at síggja gongdina í einum samfelag

yvir eitt longri tíðarskeið. Í øðrum londum hava fólkateljingar verið

minst 10-unda hvørt ár, og tí hevur borið væl til at samanbera frá eini

teljing til aðra. Men vit skulu heilt aftur til 1977 til seinasta manntal.

Fólkateljingin 2011 skal geva týðandi upplýsingar um borgararnar, og

fer at lýsa demografisku, bústaðarligu og sosialu viðurskiftini hjá okkum

øllum nógv meira umfatandi og nágreiniliga, enn vit eru von við.

Bert ein fólkateljing kann geva okkum haldfastar upplýsingar um eitt nú,

hvørja útbúgving fólk hava, hvørji størv vit hava, hvussu býlisviðurskiftini

eru ella hvussu húskini eru samansett.

Í politisku skipanini, í fyrisitingini, í gransking og undirvísing, hjá áhugafeløgum

og øðrum, verður víst á tørvin á hagtølum. Á sosiala økinum er

stórur tørvur á hagtølum, sum lýsa støðuna í landinum.

So at siga eingi hagtøl eru um, hvussu støðan er hjá húskjunum. Í roynd og veru veit

eingin, hvussu nógv húski eru í landinum.

Eisini í arbeiðsmarknaðarmálum er tørvur á hagtølum um, hvussu arbeiðsmarknaðurin

er settur saman, hvørjir førleikar eru í landinum og hvørjar útbúgvingar føroyingar hava.